Sapaatip akunnerata naanerani KRK-INUA kajumissutsiminnik sulisunut pikkorissaavoq. Tassani inuusuttut 18-nit peqataapput. Pikkorissaaneq Nuummi ingerlanneqarpoq, Nunatsinni illoqarfiit tallimat tassaasut: Ilulissat, Aasiaat, Sisimiut, Nuuk aamma Qaqortoq tamarmik INUA-mi kajumissutsiminnik sulisunik peqataasoqarput. Inuusuttut naapinnerminni eqqartorpaat INUA-p ingerlaqqinnissaanut takorluukkatik, sammisaqartitsinernilu pilersaarusiortarneq isumassarsiarineraniit piviusunngortinneranut aamma sammivaat. Qulequttamut tunngatillugu KRK-INUA-mit Mette Steenholdt coacheq qaaqquneqarpoq, tassani Mettep inuusuttut isumassarsiaasa qanoq piviusunngorsinnaaneri, kajumissusaasa qaffassarneri takorluukkallu qanoq piviusunngortissinnaanerinik saqqummiivoq.

Inuusuttut assut nuannisarput. Inuusuttut kajumissutsiminnik sulisut oqaluttuarput isumassarsiamik siunissami qanoq atorsinnaanerisa ilinniarnerat assut soqutiginartoq, inuusuttorpassuillu kajumissutsiminnik sulisut naapillugit pissarsiaqarnarnerarpaat. Inuusuttut ilaat oqaluttarpoq:” Siunissami kissaatima oqaasinngornertinneri assut iluarpoq – massakkulliuna kissaatima piviusunngornissaat aallartikkukku”. “Kajumissutsiminnik sulisut illoqarfinni allaneersut naapillugit assut iluarpoq, misinnarnerulerpoq kajumissutsimik sulisut amerlanerusut”.

Attaveqatigiilluarsinnaassagaanni qanoq iliortoqarsinnaaneranik aamma eqqartuipput, taakku inuusuttoqatiminnut sullissinerminni ulluinnarnilu ilaquttaminnut ikingutiminnullu aamma atorluarsinnaavaat.

Peqataasut ilai aatsaat siullerpaamik INUA-mi pikkorissaanermi peqataalerput. Qaqortormiut pingasut kajumissutsiminnik sulilertussat nutaarluinnaat aamma peqataapput.

KRK-INUA-mit qutsavigerusuppavut Tips & Lottop aningaasaliineratigut pikkorissaanerput piviusunngortissinnaammat, Air Greenlandillu Ilik aqqutigalugu billetsinik akikillisaaffigisinnaammatigut, kiisalu Brugsenimut qujanarujussuaq sisorsarfissiornitsinni/anaalerinitsinni nappartap imassaanik mamakujuttunik akeqanngitsunik tunimmatigut.

INUA tassaavoq kajumissutsimik sulisut ataatsimoorfiat, inuusuttut 17-35-nut ukiullit peqataaffigisagaat.