Kattuffinnik allanik suleqateqarneq

 

Kalaallit Røde Korsiat ilaasortaminut Nuummi ataatsimeersuartitsinerani uani weekendimi 20. – 21.10. pisumi nuna tamakkerlugu siulersuisunik qinersipput. Siulersuisunilu inissat assut pilerngunneqarput, naligiittaqattaartorujussuupput allaat siulersuisut nutaat nassaariniarnerini qinersinerit arlallit ingerlattariaqarlugit.

Ukiorpaalunngortuni Kalaallit Røde Korsiata anguniartuarpaa kajumissutsimik sulisut nukittorsarneqarnissaat. Nuannertorujussuuvoq Nuna tamakkerlugu siulersuisuni suleqataarusuttut amerlammata. Ataatsimiinnermi peqataapput Uummannami, Aasisanni, Sisimiuni Maniitsumi, Nuummi, Qaqortumi Tasiilamilu KRK immikkoortortaqqarfiineersut, kiisalu Dansk Røde Korsimiit vicegeneralsekretær Lene Krogh.

Ataatsimeersuarnerup arfininngornerani siulersuisuni sulineq pillugu workshopperput.

Ataatsimeersuarnermi aalajangerneqarportaaq 17 verdensmål ukiuni tulliuttuni marlunni sammineqarluassasut.

Nuna tamakkerlugu siulersuisut ukuulerput:

Siulitaasoq: Christina Tønder Bell formand@krk.gl

Siulitaasoq tullia: Nina Kreutzmann Jørgensen, Nuuk ninakjoergensen@gmail.com

Aningaaserisoq: Kunuunnguaq Olsen, Maniitsoq

Ilaasortaat: Jakob Abelsen, Qaqortoq  aamma Agathe Steenholdt, Aasiaat

Sinniisussat: Jens Peter Møller, Sisimiut aamma Lisbeth Kreutzmann Petersen, Maniitsoq

 

Kunuunnguaq Olsen, Lisbeth K. Petersen, Jens Peter Møller,

Christina Tønder Bell, Agathe Steenholdt aamma Nina Kreutzmann Jørgensen

 

Ataaniittoq, Formandip nalunaarusiaa 2017 tunngasoq saqqummiussaa, atuaruk

 


2017-imi ataatsimoorneq nukiusoq takussutissaavoq.

Januaarip ingerlanerani Tasiilami alianartunik pisoqallattaareernerani inuit arlallit piumassusillit aalajangerput Tasiilami inuuneq, imminnut ataatsimoornerlu nersortariaqalerneri piffissanngortoq. Oqariartaaseq “ataatsimoorneq nukiuvoq” aallaavigalugu Røde Korsimi immikkoortortamik pilersitsiniarluni aallarnisaasoqarpoq, ukiorlu siulleq pisoqarfiulaavippoq! Tasiilami immikkoortortaqarfik cafémik, oqarasuaatikkut oqaloqateqarfissamik, nuersaalluni ataatsimoorfimmik allarpassuarnillu aallarnisaapput. Immikkoortoqarfimmi pilersitserusussuseq takussaasoq assut isumassarsiorfiuvoq.

Aasianni immikkoortoqarfimmi nutaami aamma piumassuseqarfiullunilu pilersitserusussusermik assut takussutissiivoq. Immikkoortoqarfiup atornikuerniarfiata ingerlalluarnera aamma aaqqissuillaqqilluinnarnerannut takussutissaavoq. KRK-p inuusuttunut pilersaarutaat INUA Aasianni aamma pilersinneqarpoq, tassanilu sumiluunniit nammineq piumassutsimik suligaluartut INUA-mi tunngaviusumik sungiusarnermi tamarmik peqataapput. Tamanna torrageqaara pissutigalugu patajaatsumik ataavartumillu INUA-p ingerlanneranut immikkoortoqarfimmi sammisassat aqqutigalugit suleqatigiilluarnissamik periarfissiissammat.

Karrat Kangerluanni tassaarsuaqarnera

2017-imut kingumut qiviasagaanni Kalaallit Røde Korsiat qanoq inissisimaffeqalersimanersoq eqqarsaatiginanngitsuunngilaq, nunarsuarli tamakkerlugu Røde Korsip inissisimaffia takornartaanngilaq: Røde Kors upalungaarsimanermik peqatigiiffiusoq. Qanga Henry Dunant 1863-imi nunarsuaq tamakkerlugu Røde Korsip pilersikkiartuaarnissaanut eqeersaammat, tassani upalungaarsimanermik peqatigiiffimmik pilersitsivoq. Taamaammat nunarsuaq tamakkerlugu peqatigiiffiusumik pisumi nutaami taama periataartigisumi, taama suleqatigiilluartigisoqarsinnaammat ilaasortaalluni toqqissisimanarpoq. Islandimi Røde Korsi Danmarkimilu Røde Korsi ukiut ingerlanerini suleqatigiinneq pilersissimasarput pisumi nalitusimaqaaq.

Karrat Kangerluanni pisumut tunngatillugu nunani allani suleqatigut ikiuunnerannut  kisiisa qujassutissaqarfiginngilagut. Nuna tamakkerlugu ataatsimoorpugut, tassanilu ataatsimoorneq nukiusoq erserpoq. Aasianni namminneq piumassutsiminnik sulisut aaqqissugaalluartumik sulipput qimagussugaasunut ikiuinissamut piareersimallutik, naak immikkoortoqarfik nutaagaluartoq. Sulilu maannamut qimagussukkat pisariaqartitaat eqqumaffigalugit, soorlu atornikuerniarfimmiit atisanik allanillu immikkoorsissuttarlugit. Nuummi namminneq piumassutsiminnik sulisut atisanik katersinissamut immikkut annertuumik aaqqissuillutik suliaqarput. Ullup affaannaa atorlugu katersortarfik atisanik, nanginik, nerisassanik, sakkunik, aliikkutassanik allarpassuarnillu qimagussukkat atorfissaqartissinnaasaannik ulikkaarpaat, taakkulu poortoriarlugit nassiunneqarput. Inuit tamarmik ikiuussinnaagaangata aatsaat tamanna pisinnaasarpoq.

Suliatsinnut atatillugu aamma aningaasatigut tapersersorneqarpugut. Grønlandsbankeni katersuiniarnermut kontomik ammaammat aalajangiunneqarpoq aningaasat Røde Korsimi ikiuninermut suliaannut ingerlassasut. Tamanna Røde Korsip suliamik kivitsisinnaanneranut tatiginninnermik takussutissaavoq – tatigineqaannarnissarlu suliniutigiuarparput. Taamatut tatigineqarneq imaasiallaannaq pineq ajorpoq, aalajangersimaannarnissarput aammalu aningaasat katersorneqartut qanoq ingerlanneqarnissaasa ilisimaarinissai pisariaqarpoq. Aningaasanik katersiniarneq iluatsilluaqaaq, naatsorsuutillu takutippaat 2018-imut aamma aningaasat naammattut.

Ikiueqqaarneq

Karrat Kangerluanni tassaarsuaqarnerata eqqaasippaatigut ilumut ikiueqqaarneq pisariaqavissoq. Timikkut ikiueqqaarnerinngaanngitsumik, aamma eqqarsartaatsikkut ikiueqqaarneq. Inersimasut marluugaangata aappaa ikiueqqaarnissamut pisinnaanissaa Kalaallit Røde Korsiata anguniagaraa. Ikiueqqaarneq iluaqutaasinnaaqaaq taamaattumik peqatigiiffiup atuutiinnarnissaanut pingaaruteqaqaluni. 2017-imi timikkut ikiueqqaarnermut ilinniarsimasut 1500-inik amerlassuseqarput, taakkulu pikkorissarnerni 100-ni agguataarneqarsimapput amerlasuullu aamma eqqarsartaatsikkut ikiueqqaarnermut ilinniarlutik naammassipput.

INUA alliartorpoq

INUA-mi sammisaqarnerit 2017-imi pisoqarfiulluarput. Erni Kristiansen inuusuttunut siunnersortitut atorfinitsinneqarmat nuna tamakkerlugu INUA-mi sammisaqarnerit uummaarilersimaqaat. Qaqortumi aamma 2017-imi INUA-mi sammisaqarnerit nutaarluinnaat aallartisarneqarput.

Aasaanerani tammaarsimaarneq

2017-imi aasaanerani tammaarsimaarneq Nuummi ingerlanneqaqqippoq, tassanilu meeqqat 17-it inersimasullu arfineq marluk peqataapput. Tammaarsimaarfimmut umiatsiamik siumut angallanneqarnerat Arctic Umiaq Linemit aningaasaliiffigineqarpoq, aasaaneranilu tammaarsimaarnerup aningaasaliiffigineqarnera Tips og Lottomit, NunaFondenimit kiisalu Helene og Svend Junge Fondimit aningaasaliiffigineqarluni.

Tunissutit, inuiaqatigiinnut nunarsuarlu tamakkerlugu upalungaarsimanermut aningaasaateqarfik

2017-imi aamma Herstedvesterimi kalaallit parnaarussat meeraasa juullimut tunissutissanik tunisalernissaat kajumissaarutigineqarpoq. 2017-imilu aamma Karrat Kangerluanni tassaarsuaqareerneranut atatillugu nunatsinni upalungaarsimanissamut aningaasaateqarfik atuutilerpoq.

 

IKIUUTTARTUNNGORIT_UP

Ilaasortanngorit_UP

 

 

Facebook-ikkut malitsiut

FB_KNAP

 

Røde Kors pulaaruk

DRK_KNAP