Kalaallit Røde Korsiata Tarnikkut ikiueqqaarneq aallunnerulernialerpaa

8. May, 2020

Maajip 8-ni nunarsuaq tamakkerlugu Røde Korsip ullorivaa, ullormilu tassani kajumissutsimik sulineq inuppalaassuserlu nalliussineqartarput. Røde Kors 1863-imi aallartinneqaramili ilisarnaatigisarpaa ikiueqqaarneq, ikiueqqaarnerlu 1973-imili Nunatsinni neqeroorutaalerpoq.

Taamaattumillu nuannaarutigalugu nalunaarutigissavarput ikiueqqaarneq alla pingaarutilik annerusumik ingerlattalileratsigu, tassalu Tarnikkut ikiueqqaarneq. Tarnikkut ikiueqqaarnermi ilinniarneqartarpoq inuk arlaatigut artornartumik nalaataqarpat qanoq ikiorneqarsinnaanersoq. Qanigisamik annaasaqaraanni, ajunaartoqarsimatillugu imaluunniit arlaatigut tupannartumik pisoqartillugu amerlasoorpassuusugut assigiinngitsunik qisuariaateqartarpugut. Uani pikkorissaanermi ilinniarneqartartut ilagaat ajortoqarsimatillugu kammalaatit, ilaquttat suleqatillu qanoq ikiorneqarsinnaanersut. Inuiaqatigiinni arlaatigut ajortoqarsimatillugu qanoq iliuusissat assigiinngitsut aamma ilinniarneqartarput. Kalaallit Røde Korsiat Tarnikkut Ikiueqqaarnermi ilinniartitsisinnaasunik pikkorissaasarpoq, taakkulu pikkorissarneqartut suliffeqarfimminni Kalaallit Røde Korsiatalu ataani atorsinnaasaminnik ilinniartitsisinnaaneq ilinniartarpaat. Qilanaaqaagut Tarnikkut ikiueqqaarnerup annerusumik aallartinnissaanut.

Nuna tamakkerlugu siulittaasoq Christina Tønder Bell oqarpoq:

“Isumaqarpugut Tarnikkut ikiueqqaarneq ikiueqqaarnertut allatuullu pingaaruteqartigisoq. Inuiaqatigiit amerlannginnatta nuanniilliorfiusuni imminut ikorfartoqatigiinneq ikioqatigiinnerunerlu pisariaqartittarpavut. Tarnikkut ikueqqaarnerup pikkorissaatigisalernerani inuiaqatigiittut piginnaasavut qaffassassavagut eqqarsartaatsikkullu peqqissuseq nukittorsarlugu.”

Inuunermik annaassisinnaavutit

Kalaallit Røde Korsianni anguniarparput inuit affai Tarnikkut Ikiueqqaarnermik ilinniarsimassasut. Ikiueqqaarsinnaaneq inuunermik annaassisinnaavoq, ajutoornerlu millisarneqarneqarsinnaavoq, kingunerlutsitsinissaraluillu aamma millisarneqarsinnaallutik. Kalaallit Røde Korsiat assigiinngitsunik ikiueqqaarnermut tunngasunik pikkorissaasarpoq, aammattaaq Issittumi ikiueqqaarneq pilersinnikuuaat. Pikkorissaarniarluni pisinermi inuppassuit ikiornerinik kinguneqarsinnaavoq. Pikkorissaanermi ilikkarneqartartut inuup silarsuaanut allanngueqataarujussuarsinnaapput, pikkorissaanermik pisiaqarnermi sinneqartoorutit suliniutinut Nunatsinni inunnik ikiuinermik siunertalinnut nunanilu allani inunnut ikiuiniaqatigiiffinnut atorneqassapput.

Paasisaqarnerorusukkuit: http://www.krk.gl/foerstehjaelpskurser/

Kalaallit Røde Korsiata tunuliaqutaa

Kalaallit Røde Korsiat nunatsinni atuutileramili ukiormanna septemberimi ukiut 28-nngussavai. Kattuffillu arfineq-marlunnik immikkoortortaqarfeqarpoq, atornikuerniarfiit arfinillit kiisalu inuusuttunut immikkoortortaqarfiit arfinillit. Allaffimmiut pingasut eqqaassanngikkaanni Røde Korsimiittut tamarmik akissarsiaqarnatik sulisarput. Kattuffiup aningaasaqarnera aningaasaateqarfinnut qinnuteqartarnikkut Ikiueqqaarnermilu pikkorissaanermi isertitanik aningaasalersorneqartarpoq. 2020-mi assigiinngitsunik pissanganartorpassuarnik suliaqarpugut, soorlu KRK- INUAmi kajumissutsimik sulisut, Coronartoqarnerani ikiuuttartut, Fortæl For Livet utoqqarnut kiserliortunut suliniut.

Paasisaqarnerorusukkuit:

Nuna tamakkerlugu siulittaasoq Christina Tønder Bell uunga attavigisinnaavat formand@krk.gl imal. 55 56 42 Allaffeqarfik krk@krk.gl oq. 32 18 00

Ukioq 2021-imi ikiueqqaarnermut nersornaat
Ukioq 2021-imi ikiueqqaarnermut nersornaat

Kalaallit Røde Korsiata anguniakkamini pingaartitaasa ilagilluinnarpaat; inuit marluugaangata ataaseq ikiueqqaarnermik pikkorissarnikuusimassasoq. Tamanna inuiaqatigiinni avinngarusimatutut...

Atuaruk
NUUMMI immikkoortortaa
NUUMMI immikkoortortaa

ATAATSIMEERSUARNISSAMUT Qaaqqusivoq Pingasunngornerm februaarip 24-ni 2021 nal. 17.00Imaneq 41, ataatsimiittarfiani(Oles Varehusikoq. Tele Post akiani isertarfeqarpoq) Oqaluuserisassat:•...

Atuaruk

Bliv frivillig

Bliv medlem

Vælg mellem: