Kalaallit rødekorsiata Nuummi immikkoortortaata siulersuisuisa ataatsimiinnerminni ulloq 12.november 2013 aalajangerpaat, Filippinerini anorersuarnik eqqugaasut 50.000,-koruuninik tapiiffigineqassasut.
Aningaasat tunissutit ikiuinissamut aalajangersimasumut atorneqarnissaat siunniunneqarpoq, tassalu ilaqutariit meerartallit imermik eqqiluitsumik imigassaannut atorneqassasut.
Aningaasat Rødekorsip Nuummi immikkoortortaanit tunissutigineqartut tamarmik pisiniarfimmit atornikuusivimmiit isertitat sinneqartoorutaanneersuupput. Pisiniarfimmilu pisiniartartorpassuatta ilagivaat Filippinerit Nuummut nunassissimasut.
Kalaallit Rødekorsiata siulersuisui ullumi 14.november aamma alajangiipput, nunap iluani ikiuinissamut aningaasaateqarfimmiit 50.000 koruunit Filippinerini anorersuup aseroraanik eqqugaasunut tapiissuteqarniarlutik. Taamaalilluni nunatsi Rødekorsi katillugu 100.000 koruuninik anorersuup eqqugaanut ikiuniarpoq.
Anorersuup sakkortoqisup Filippinerit eqqormagit, illorpassuit atortullu amerlaqisut annaaneqarput, sapaatiummallu ullaakkut nalunaarutigineqarpoq inuit 10.000-it annaaneqartut. Nunarsuaq tamarkkerlugu Røde Korsit ikiuiniartartoqatigiivinit naatsorsuutigineqarpoq suli kisitsisit amerlanerungaartut saqqummerumaartut, annaassiniartut sulinerat iluatigalugu.
Røde Korsi inunnik annaasiniarluni ikiueqqaarnermik suliaqarpoq, ikiueqqaarnermullu atortussat nalinginnaasut pisariaqartitsisunut agguaatarlugit, soorlu tippit, ulersuit, nakorsaatit aammalu imeq imigassaq. Sillimavugut piareersarlutalu annertuumik ikiuiniarnermik suliaqassalluta, ulluni sapaatip akunnerinilu aggersuni.
