TUSAGASSIUTINUT NALUNAARUT

10. Mar, 2022

Kalaallit Røde Korsiata Ukrainemi sorsunnermi eqqugaasunut nuna tamakkerlugu katersuiniarnera

Ukrainemi sakkutuut atorlugit sorsunnertalimmik tiguaaniarnerup kinguneraa inuit millionilikkaat ilaquttaminnik, angerlarsimaffimminnik allanillu ulluinnarni sungiusimasaminnik annaasaqarnerinik. Ukrainemi Røde Korsimit ikiuiniartartut aallartereerput aammalu ikiunertik ingerlatiinnassallugu – ikiuuttuassappullu pisariaqartitsisoqartuartillugu. Røde Kors ikiueqqaarnermik ingerlataqartarpoq, nerisassanik, imerpalasunik agguaasarpoq aammalu Ukrainimi napparsimmavinni atortussanik pilersuisuullutik. Pisariaqartitsineq annertoqaaq.

Katersuiniarnermi matumani aningaasat tamarmik ikineqartut ilanngaatitaqanngitsumik Røde Korsip Ukrainimi meeqqanut inersimasunullu ikiuiniarneranut atorneqassapput.

Nammineq annertussusilikkannik konto normumut ikisigit – 6471 158 96 09

Soorliuna ikiuissasugut aammalu Ukrainemut aningaasanik nassitsissasugut?

Kalaallit Røde Korsiat nammineq ingerlasuuvoq, nunarsuarmilu ikiuiniaqatigiiffiup Røde Korsip ilagalugu. Røde Korsi nunani 192-ini immikkoortortaqarfeqarpoq aammalu nunarsuaq tamakkerlugu 13 millioninik namminneq kajumissutsiminnik sulisunik suleqateqarluni.

Røde Korsimik tunngaviliisup Henri Dunantip, sulissuteqarneratigut Genevé-mi isumatagiissummi atuutilersinneqarpoq, illuatungeriit sorsuttut ikiuiniaqatigiiffiit sakkulersorfigissinnaanngikkaat aammalu sorsunnermi eqqugaasut taakkunannga ikiorserneqassasut.

Nunarsuatsinni ikiuniaqatigiiffiup tunngavigisai tamanit paasineqarsinnaallutik isumassarsiaapput. Tassa nunarsuarmi tamarmi atuuttussamik sumulluunniit sukkulluunniit pituttugaanngitsumik ikiuinaqatigiiffimmik pilersitsinissaq.

Taamaasilluni inuit naalliuutaanik ajornartorsiutaannillu annikillisaasussamik aamma ikiuiniartussamik, upperisaq, sumiuuneq politikkikkullu inissisimanerit apeqqutaatinnagit. Suliniaqatigiiffik sorsuffimmi sumulluunniit attuumassuteqarani sulisinnaasoq.
Pilersinneqareernermini Røde Kors inerisarneqarsimavoq aammalu annertussutsimigut pingaruteqassusermigullu allisimaqaaq, kisiannili aallaqqaataaniit isuma taanaajuarpoq.

Røde Korsip immikkoortortaqarfii pisussaaffeqarput tunngaviliussimasatik arfineq marluk aallaavigalugit sulissallutik, taakkuuppullu inuppalaassusermik aamma politikkikkut pituttorsimannginnermik aallaaveqartut. Atornikuerniarfiit, Juullimi pissakinnerusunut tapiisarnerit ikiueqqaarnerillu saniatigut, Røde Korsip pinngortitap nukiisa ajunaarnersuaqartitsisarnerani eqqugaasunut ikiuisarpoq aammalu sorsunnermi sumiluunniit eqqugaasunut.

Tassa naatsumik Røde Kors taamak suleriuseqarpoq, apeqqutaatinnagu suminngaanneersuuneq aammalu qanoq oqaaseqartuuneq.

Tamanna ingerlariuseq nuannersuuvoq aammalu pinngitsoorneqarsinnaanngilaq.

Taamak isilluni Røde Kors nunani nunarsuatsinni amerlaqisuni sulivoq, tassa Røde Korsip tunngavigisai tamanit akuerineqarmata aammalu Røde Korsip suliniuteqarnera sumiluunnit ataqqineqartarmat – kiammi inuit eqqugaasartut ikiorsissammagit?

Uummannap sulluani Nuugaatsiami ajunaarnersuaqarmat Kalaallit Røde Korsiat 1,8 million koruuninik katersivoq, taakkualu ilaqutariinnut eqqorneqartunut, angalanernut, pequttanut aammalu tarnip pissusaannik immikkut ilisimasalimmik oqaloqateqartarnernut atorneqarput. Taakkunannga 1.1 million kruunit Dansk Røde Korsimiit, Savalimmiut Røde Korsianiit aammalu Danskit suliffeqarfiutaannit aningaasaateqarfiinniillu arlalinnit aningaasaliissutaapput. Taassuma saniatigut aningaasaateqarfik nunatta avataaneersoq piniarnermut atortunut 1. mill. Kr.-inik tapiissuteqarpoq. Taanna qunaani pineqartuni natsorsuutini 1,8 milliuuniusuni taaneqanngillat.

Nalunaqaaq – Kalaallit Nunaata tamanna ikiorserneqarnissaq atorfissaqarteqqileriannaavaa.

Qaa, Kalaallit Nunaat – Tunniussagut annertuninngorlutik uatsinnut utertarput. Taamaasilluta Kalaallit Nunatsinni nammineerluta nunarsuarmioqatitsinnik ajornartorsiortunik ikiuisinnaanerput takutissinaavarput. Tamatta nammineq annertussusilikkatsinnik ikisilluta. Annikitsunnguugaluartut amerligaangamik aningaasarparujussuanngorsinnaasarput. Taakkualu Ukrainemi meeqqanut inersimasunullu ikiuiniarnermi iluaqutaasussaapput. Assersutigalugu kr. 210,- meeqqamut ataatsimut qaammammi ataatsimi nerisaqartitsinissamut naammapput.

Ikiuuttartunngorit

Ilaasortanngorit

Toqqaagit: