Kalaallit Røde Korsiata anguniakkamini pingaartitaasa ilagilluinnarpaat; inuit marluugaangata ataaseq ikiueqqaarnermik pikkorissarnikuusimassasoq. Tamanna inuiaqatigiinni avinngarusimatutut inississinnaasartuni pingaarluinnartuuvoq. Pingaaruteqarluinnarpoq erngerluni eqqortumik inuunermik annaassinissamik pikkorissarsimanissaq. Taamaattumik Kalaallit Røde Korsiat suliniaqatigiiffittut
ukiumoortumik ikiueqqaallammammik nersornaasiisalernissamik aaliangiinikuuvoq. Taannalu kr. 10.000,-inik aningaasartaqarpoq.
2021-imi ikiueqqaallammammik toqqaaneq ataqqinaataasoq aammalu aningaasartaqartoq inummut ataatsimut tunniunneqassaaq.
2021-imi ikiueqaarnermi nersorneqartussatut toqqarneqartoq julip arfineq pingajuanni 2021-imi, uini ernutartillu sisamanik ukioqartoq ilagalugit umiatsiaaqqaminnik Niaqornaarsuup iluani Qarlutuumi Puersumi angalaarsimapput. Puersu Niaqornaarsumiit 70 km missaannik ungasitsigisumiippoq.
Pineqartut asimiinnerini uisoq, Aqqalu Søholm tassanngaannaq ummamminik unittoorluni uppippoq. 2021- imilu ikiueqqaarnermik nersornaasigassasoq nangaarianngivilluni ikiueqqaarnermik ingerlatsilerpoq, tamassumalu kinguneranik uummarsaaneq iluatsippoq.
Iluatsittumik uummarsaareernerup kingorna Ukioq 2021-imi ikiueqqaarnermi nersornaasigassatut toqqagaasoq ernguttani sisaminik ukiulik uinilu Niaqornaarsummut 70 km-imik isorartutigisumik umiatsiaaqqamik ingerlappai. Niaqornaarsummut apuutereernerup kingorna Aqqalu Søholm Aasiaat napparsimaviannut erngertumik ingerlanneqarpoq taassumalu kingorna Rigshospitalimut oqquneqarluni. Rigshospitalimilu uummanninik suliaritippoq pacemakerilerneqaatigisaminik (uummatikkut batteriitortumik atortulerneqarluni)
Ikiueqqaarnermi ataatsimiititaliap siulittaasuata Julie S. Bendtsen-ip tunngavilersuummini makkua aallaavigai:
”2021-imi ikiueqqaarnermik nersornaaserneqartussatut innersuunneqarsimasoq kr. 10.000-inik aningaasartalimmik nersornaaserneqarnissaa aaliangiussimavarput. Tamassumunnga tunngaviulluinnarpoq 2021-imi nersornaasigaassatut innersuunneqartoq ilisimaarinnilluarluni, sukkasuumik sukumiilluinnartumik ikiueqqaarnermut ilisimasani atorsimammagit, taamaasillunilu inuup inuuneranik annaassilluni.
Innersuussinermik paasissutissat ataatsimiititaliamut saqqummiunneqarsimasut tunngavigalugit qularutissaanngilluinnarpoq, sukkasuumik ikiueqqaartoqarallartillugu Aqqalu Søholmip inuunera annaanneqarsinnaasimasoq.
Taamaattumik Kalaallit Røde Korsianiit innersuunneqarsimasoq nersorniarlugu aaliangersimavugut, taamatullu allat aamma kajumissaarusuppagut ikiueqqaarnermik ilinniarnissamik taamaasillunilu ikiueqqaarsinnaanissamik pisinnaanngorlugit. Pingaaruteqarluinnarpormi innuttaasuni tamani
ikiueqqaarsinnaanissamik ilisimasaqarnerulersitsinissaq, taamaasilluni qanoq pisumik ajutoortoqassagaluarpat ikiueqqaarsinnanissaq pisinnaanngorlugu”
Maanna Kalaallit Røde Korsianiit nuannaarutigalugu tulluusimaarutigalugulu ukioq 2021-mi Ikiueqqaarnermi nersornaammik tigusisussatut toqqarparput, Agnethe J. Søholm Niaqornaarsunninngaanneersoq.
Agnethe J. Søholmip qujassuteqarnermini ukua taarusussimavai: ”Qujassuteqarfingerusuppakka Kalaallit Røde korsiat. Ikiueqqaarnissamut qaquguluunniit nalaataqarfissanni sakkussannik tunisimammannga. Taamatullu aamma perorsaasikka angajoqqaakka qutsavissaqarfingingaarpakka. Meeraaninni angallattuartarsimammannga pinngortitami qanorluunniit nalaataqarfinni akisussaaffimmik
tingusisinnaanngortillunga”.
Nersornaat Agnethe J. Søholm-mut tunniunneqareerpoq. Nunatta isorartussusersua aammalu Covid 19-imik peqquteqartumik oqarasuaatit aammalu internet atorlugit tunniussineq ingerlanneqarpoq. Nersorinninnermut allagartaq nassiunneqassaaq, aningaasartaalu tunniunneqarlutik.
