Aqqusinermi angallannermi ajutoortunik naammattoorsiguit qanoq iliussavit, imaluunniit qitornat ajoquserujussuarpat?
Ikinngutit suleqatilluunniit uummamminik unittoorluni uppippat qanoq iliussavit?
Ikiueqqaarnermi ilitsersuisut nutaat 17-t Kalaallit Røde Korsianni nal. ak. 80-ini pikkorissareerlutik tamanna takutissavaat.
Kalaallit Røde Korsiata anguniakkatut takorluugaraa inersimasut marluugaangata, appaa ajutoortoqartillugu nalaataqarnermi ikiueqqaarsinnaalissasoq.
Ilitsersuisutut ilinniarneq annertuumik piumasaqaatitaqarpoq. Ullormi siullermiilli ilinniakkatigut timikkullu annertuumik piumasaqaatitaqarpoq – sukumiisumillu itisilikkamik ilinniarnerulluni.
Ilitsersuisunngorniat 20-t aallartipput, 17-t soraarummeerlutik naammassipput. Uani inuunermik annaassisinnaanissaq sammineqarpoq – tamannalu maanna ilinniakkaminnik naammassisut atuartisassariligassaminnut siunissami ingerlateqqittussaassavaat. Ilinniarneq tamanna Kalaallit Røde Korsianni annertuumik sukannersumillu piumasaqaatitaqarnermigut Danmarkimi Europamilu ilinniakkanut assingusunut nallersuuppoq.
Maannamut Kalaallit Nunatsinni ikiueqqaarnermi ilitsersuisut ilinniarsimasut 82-upput.
Instruktøritut naammassisut: Johan M. Hansen – Nuuk, Hans Karl Lundblad – Nuuk, Ludvig Willumsen – Nuuk, Kim Heilmann – Sisimiut, Antuuaraq Abelsen – Paamiut, Otto “Akku” Kielsen – Kangerlussuaq, Johan Barlaj – Nuuk, Nivi Willumsen – Nuuk, Marie Gundel – Nuuk, Gunhild Schulze – Maniitsoq, Carl Villadsen – Nuuk, Maibritt Carlsen – Nuuk, Mona H. Goliathsen – Maniitsoq, Pia Larsen – Nuuk, Pia Sørensen – Sisimiut, Axel Lund Olsen – Sisimiut