Atornikuerniarfik nunatsinni illoqarfiit annersaasa pingajuanni Ilulissani matussaaq inissiffissaqanngimmat

Kalaallit Røde Korsiata Ilulissani immikkoortortaqarfia 1980-imi piulernikuuvoq, immikkoortortaqarfimmili marloriarluni ataatsimeersuariartoqqusigaluareernermi allatut ajornartumik siulersuisut immikkoortortaqarfillu taamaatiinnartariaqalerput. Tamanna siulersuisutut sulinissamut soqutiginninnerup annikippallaarneranik aammalu takkuttut ikippallaarnerinik peqquteqarpoq.

Siulersuisut taamaatittut, Regine Biilmann aamma Bodil Davidsen siuttuullutik, ukiualunni atornikuerniarfiup barakkimit isasuungajalersumit, ukiuni kingullerni amerlasuuni namminersorluni niuertarfiutilimmit attartugassatut innersuunneqartumit, pitsaanerusunik atugassaqartitaanissaanik ilungersorlutik suliniuteqaraluarput. Atornikuerniarfik kuuinnartumik imeqanngilaq aammalu aserfallatsaalineqarsimanngitsutut isikkoqarluni oqoqarlunilu. Ukiut ingerlanerini siulersuisut assigiinngitsutigut ininik piukkunnartunik ujaasinikuugaluarput, ilaatigut kommunalbestyrelsinut assigiinngitsunut saaffiginnittarlutik ajoraluartumilli iluatsitsinatik. Tamaattoqarnerata siulersuisut ima nukillaarsarsimatigaat, atornikuerniarfiuunnaanngitsoq siulersuisulli aamma tunuartariaqalersimallutik. Alianarpoq immikkoortortaqarfik matusariaqalermat, tassami ukiut 20-t sinnerlugit ilaasortaqarnikuugaluarmat eqeersimaartunik kajumissutsimillu suliaqartunik.

Atornikuerniarfiup matunerata kinguneraa, ilinniartut – allallu isertitakitsut – imminnut ilaquttaminnullu akikitsunik atisarsisinnaajunnaarmata. Aammalu “atoreerukku igiinnassavat”-mik kulturimut ilasaataassaaq. Avannaata Kommuniani nunaqarfinnut ima kinguneqassaaq pingaartumik meeqqat atisaannik nassinneqartarunnaarnissaannik. Immikkoortortaq matummat Ilulissani juullilernerani ikiorsiissutinik ukiuni tulliuttuni agguaassisoqartarunnaassaaq.

Ilulissani atornikuerniarfiup aallarteqqinnissaanik peqataarusuttoqassaguni allatulluunniit Røde Korsip Ilulissani inoqatinut ikiuunneranut ingerlatitseqqeerusuttoqassaguni tapersersorneqarneq, siunnersorneqarneq aamma Kalaallit Røde Korsiannit siulersuisunillu tunuartunit tapersersorneqarneq naatsersuutigisinnaavaat.