Ulluni makkunani ataatsimoorluta ikioqatigiinnissarput pisariaqarpoq. Qujanartumillu inuit amerlasuut ikiuillutik aallartereerput. Inuppalaassuseq Facebookkikkut takoqattaarparput, inuit ikiortissarsioraangamik ikiorneqartartut, coronartoqarneranilu mattusimagallartunut pisiniarnissamut ikiuukkusullutik neqeroortut amerlaqaat. Ajunngitsuliornerpassuit ingerlareersut Kalaallit Røde Korsiata tapersersorusuppai, ikiorneqartariallillu tamarmik ikiorneqarnissaannut qulakkerinneqataarusulluni. Taamaattumik Nuummi Røde Korsi ataqatigiissaarilluni inuillu ikiortariaqartut sumiinnerinik suliaqarluni aallarteruttorpoq. Røde Korsip qulakkeerusuppaa ikiuineq toqqissisimanartuussasoq.
Kalaallit Røde Korsiat KRK-INUA-lu Nuummi Ikiuuttartut pilersippagut, illoqarfinni allani pisariaqartitsisoqarsinnaanera aamma eqqumaffigaarput. Illoqarfinni allani pisariaqartitsisoqalissappat aqutsisoorusuttunik illoqarfinni ukunani pissarsivugut: Maniitsoq, Tasiilaq, Ilulissat, Aasiaat, Qaqortoq Nanortalillu.
Nuummiippit ikiorneqarnissannullu pisariaqartitsillutit?
.
Innuttaasut eqqugaasut, soorlu angerlarsimaffimminni mattusimasut, utoqqaat, inuit aningorneqarsinnaanngitsumik nappaatillit allallu timikkut akiuussutissakinnerusut virusimik tunillatsinnissaminnut qaninnertut nalineqarnikuusut. Taakkununnga CIVID-19 inuunermut ulorianartorsiortitsinerusarmat. Ulluinnarni suliassat soorlu nerisassanik pisiniarnerit, nakorsaatinik aallernerit allallu angerlarsimaffimmit anilluni suliassat suliarinissaannut periarfissaqanngitsunut angerlarsimaffiup avataanit ikiortariaqartunut neqeroorutaavoq. Nuummiikkuit ikiorneqarnissallu pisariaqartillugu uunga allagit ikiuutta@krk.gl imaluunniit 23 25 44-mut sianersinnaavutit ulluinnarni nal. 13.00- 15.00
Allanngueqataarusuppit?
Ikiuukkusukkuit attaveqaatitut imaluunniit pisariaqartitsisunut ikiuuttartutut suleqataarusukkuit ikiuutta@krk.gl -mut allagit imaluunniit 23 25 44-mut sianerut ulluinnarni nal. 13.00-15.00 Illit suliffeqarfiutinni sulisutit kajumissutsimik sulitikkusukkukkit imaluunniit suliniummut tapeeqataarusukkuit ikiuutta@krk.gl -mut allagit imaluunniit allaffitsinnut 321800-mut sianerit.
Kalaallit Røde Korsianni siulittaasoq oqaaseqarpoq ”Siullermiilinngilagut ulluni artortnartuni inuiaqatigiittut ataatsimoorluta, pisariaqartitsisunut ikiuunnissatsinnut piareersimavugut. Inuppalaassuseq ataqatigiinnerlu inuiaqatigiinni nukittuffigivarput. Kalaalit Røde Korsiat suliniutinut massakkut pioreersunut tapersersueqataarusuppugut inuiaqatigiinnut amerlanernut suli ikiuussinnaarusulluta. Ataqatigiissaarinertaanut tunngasut tigumminissaanut piareersarnikuugatta Ikiuuttartut pilersippagut.”
